الثلاثاء، ٢٧ مارس ٢٠٠٧

فرصه بمناسبه الربيع

فرصه للجميع
بمناسبه اعياد الربيع
معانا دستور للبيع
انتاج محلى مش تجميع
انتاج حكومه الظلم و التصنيع
اشترى قبل الفرصه دى ما تضيع
ايييه؟ هتشترى ولا تموت صريع؟
فى قطر محروق من نوع سريع
او فى عبارة ؟ ده شئ فظيع
او تتسجن فى سجن وضيع
وشركاتك يكون مصيرها التشميع
وتتحرم من اولادك كبير ورضيع
اصل ده دستور خليع
اول مافيه سياسه التجويع
وبعده كده حبس وسجن وتلويع
ولازم مع اسرائيل يكون فى تطبيع
واللى مش عاجبه التشريع
هيموت وهو فى سن الربيع
والفاسد هيكون فى منصب رفيع
والشاطر يكون فى سجن وضيع
انا بصراحه بلدى مش هبيع
لو جيبتولى الشاويش عبد السميع
دى مصر حرة رغم انف التبيع
ده الكاميرا الخفيه ؟ ها حتذيع ؟
لو عايز تذيع قول ذيع
لو مش عايز برضه هنذيع
اهو غلاسه كده وتشنيع

هناك تعليقان (٢):

غير معرف يقول...

يا عم متحرمناش من اشعارك دي بتتقل علينا كدة كذا يوم لحد متهدينا شعر جديد.........انا برضه مش هبيع يا فاروتا انا بتمني اكون مع المخلصين اينما كانوا.......والحرية لعبد الجواد

فاروتا المصرى يقول...

والله مشغول شويه
حاضر يا صاحبى من عينيه
انتوا تآمرونى وخدوا من احلى هديه
ادعولى بس ربنا يوفقنى بعروسه شقيه
تكون اخت وكمان على الاسلام متربيه
علشان تحفظنى وتحمينى من الناس اللى هيه
ونخلف بنات وولاد بشيلوا الدعوة ديه
انا تعبت ونفسى ارتاح شويه