الاثنين، ١٤ فبراير ٢٠١١

الشعب يريد اسقاط النظام


خبر عاجل وكمان هام
الشعب قالها باحترام
نريد اسقاط النظام
من غير قتل ولا اعدام
سيب البلد وروح نام
مشى وقول عليكم السلام
كفاية فساد وظلم واجرام
كفايه سرقه كفايه بقى حرام
كفايه قتل نص الشعب بقا ايتام
وفجاة وبعد شويه ايام
قالوا الريس ح هيس ويقول بيان هام
ايها الاخوة المواطنون الكرام
عليا الطلاق من مراتى قصدى المدام
انا ما هنمشى غير لما تبنولى مقام
وكمان اعرف هتدفعولى كام؟
ولما تجيبولى جمال وعز وباقى اللئام
واستنوا لما نخلص الى عليا من صيام
وكمان لما نصلى كام ركعه قيام
يمكن ربنا يغفر لى ذنوبى العظام
ساعتها ممكن نفكر فى الكلام
ياعم افهم بقى معنى الكلام
مشى وسيبنا فى سلام
نختار مصيرنا كفايه تلاتين عام
شبابنا صحا وحلف يمين ما هينام
غير لما تمشى وانتهى الكلام
والبقيه تاتى فى خلال ايام
فاروتا المصرى نفسه بقى ينام

الاثنين، ٢٠ أبريل ٢٠٠٩

السلام عليكم

السلام عليكم ورحمه الله وبركاته
احبتى واخوانى واخواتى
ايه اخباركم يارب تكونوا بخير جميعا
والله انى احبكم فى الله
ماشاء الله كل حبيايبنا منهم اللى خلف زى اختنا رينا جابت بنتين زى القمر والمعلم الدكتور مصراوى هو كمان
واللى اتخطبت زى اختنا روح الف مبروك والباقى برضه
وانا الحمد لله فى انتظار الانسة مريم فاروتا المصرى
وان شاء الله كمان كام يوم مسافر لبلد عربى (قريب ) اشتغل هناك فى شركة كمبيوتر
وياريت تدعولى بجد
وياريت نتواصل زى زمان
والسلام عليكم

الجمعة، ٢٠ فبراير ٢٠٠٩

ياااااااااااااااااه بجد وحشتونى

السلام عليكم
بجد والله كل الحبايب وحشونى
اسف جدا على طول الغياب ولكن
شويه شغل كده وبعدين بقى الجواز وانتوا عارفين
بس الحمد لله لسه الواحد يعنى شويه كده
المهــــــــــــــــــــــم
انتو ايه اخباركم ؟؟يارب تكونوا بخير
ياريت نرجع نتواصل تانى بجد نفسى
==================
فاكرين احداث غزة طبعا فاكرين
ابدا يوم الجمعه 2/1/2009 كان فى مسيرة
والحمد لله العبد لله استضافوه خمس ايام فى قسم الشرطة
ونيابة وتحريات والذى منه
بس الحمد لله كانوا ايام ربنا يتقبلها
===================
فى انتظار تواصلكم معنا
السلام عليكم
اخوكم

الأحد، ٢٢ يونيو ٢٠٠٨

تاريخ ذكرى وفكرة

السلام عليكم ورحمه الله وبركاته
احبابى واخوانى
واحشتونى جدا والله يعلم انى احبكم فى الله
اولا عذرا على التاخير فى كتابه اى جديد نظرا لغلاء الحديد
اليوم ان شاء الله 22/6/2008 العبد لله كمل 27 عام
كما ان هناك مناسبة سعيدة جدا وربنا يتم علينا كلنا بخير
ان شاء الله بعد صلاة المغرب اليوم عقد القران ( كتب الكتاب)
يعنى وداعها للعزوبية والحرية والديموقراطية ومرحبا بالحياة الزوجية
وعقبال كل الاخوة والاخوات
وياريت نشفوكم قريبا ان شاء الله فى الفرح 10/8/2008
وطبعا دى دعوة عامة لكل الحبايب
الواد مصرواى بعد انا ما خطبت قعدت اتحايل عليه انه يخطب يقوم يخطب ويتجوز قبل منى
ماشى يا دكتور ماجد وكفايه عليك خضتك لما كلمتك
الف مبروك يا حبيبى وربنل يبارك لك ويجمع بينكم فى خير
اخوكم

الثلاثاء، ٢٢ أبريل ٢٠٠٨

رب ضارة نافعه -- والله يعلم وانتم لا تعلمون

بسم الله الرحمن الرحيم
والله يعلم وانتم لا تعلمون
صدق الله العظيم

الحاج محمود يرحب بالحضور
ويؤكد على سعى الاخوان الى مواجهه الفساد رغم الظلم
جانب من الحضور
كعادته ا محمد حسين كان حريصا على الحضور والقاء كلمه اتسمت بتوضيح موقف الاخوان من الذى يحدث بمصر وكذلك بخفة ظله المعهوده


فى ابلغ رد عملى وشعبى غير مسبوق رد اهالى ادكو ورشيد ونخبه من اخوة الاسكندريه على كل الافتراءات التى تعرض لها الحاج محمود واخوانه فى القضية العسكرية الاخيرة

حيث حضر ما لايقل عن الف شخص لمنزل الحاج محمود فى احتفاليه بخروجه من القضية

ولا اقدر ان اصف لكم مدى سعادة الحاج محمود بالحضور الكرام فهو لم يفرح بالبراءة مثلما فرح بحضور هذا الكم من الناس الى منزله يوم الاثنين بعد صلاة العشاء وقال انه حصل البراءة اليوم 21/4 بحضور الناس رغم ما قيل فى القضية من كذب وافتراءات عليه وعلى الاخوة كلهم ولم يحصل عليها 15/4

وقد حضر الحفل الاستاذ محمد حسين والدكتور جمال شعلان والاستاذ معاذ السيسى وبعض اخوة رشيد واسكندريه والمحموديه واخوة ادكو وجانب كبير من اهالى ادكو الشرفاء الذين يرفضون تحويل المدنين الى محاكم عسكرية

وطبعا لم يخلو الامر من غلاسة الحبايب المعتاده حيث كان هناك كمينين بجوار منزل الحاج محمود لتخويف الناس والتضيق عليهم ولكن هيهات هيهات ..

ونوافيكم بالصور والفديوهات قريبا ان شاء الله

وانتظروا لقاءنا مع الحاج محمود يحكى لنا عن الـ 15 شهر فى سجون الظالمين



اخوكم


الأربعاء، ١٦ أبريل ٢٠٠٨

فرحة مكتومة وسعادة غير معلومة

خبر عاجل ###
الحاج محمود فى بيته الان
الحمد لله

يوم الثلاثاء من اول النهار وانا فاتح صفحات النت اتابع سبر المحكمه من خلال اخوان اون لاين ومدونتى المفضله انسى واثناء ذلك اتصل بى اخى الاكبر ليسالنى هل الحاج محمود اخد براءة قلت لم ارى الاحكام حتى الان اتصلت ببعد اقارب الحاج والحمد لله اكدوا الخبر وان الحاج براءة لم افرح الا للحظات بعد سماع الحكم على باقى المتهمين مع انه لايجوز ان اقول على شخصيات مثل هؤلاء االابطال متهمين والله هولاء مكانهم الطبيعى التكريم فضلا عن اعتلاء مناصب رفيعه فى وزاراتنا المختلفة فعندما كنت فى زيارة لطرة العام الماضى جلست معهم شعرت وكاننى فى مجلس رئاسة الوزراء من الشخصيات التى رأيتها هناك ولا اخفى عليكم سرا عندما سلمت على مهندس خيرت الشاطر شعرت بحزن شديد لان مثل هذا الرجل مكانه الطبيعى فى اى دولة تنتقى حكومتها ان يكون رئيسا للوزراء فضلا عن حكم البلاد وهذا رأييى انا === واتصلت باهل الحاج محمود وهناتهم ولم اشعر بالفرحه فى نبرات اصواتهم على البراءة وانما شعرت بحزن عميق على الاحكام الجائرة بحق باقى الاخوة وظللت طوال اليوم حزين لدرجه التوهان فعلا والتفكير فى حال بلدنا مصر الى اين تسير بنا === وبعد صلاة العشاء قابلت احد ابناء الحاج محمود وهو محمد وهو اصغر ابناءه وقد اتكء الى (عكاز) عصا وسالته ما بك يا محمد اخبرنى انه قام من النوم وجد قدمه تؤلمه وكان يضحك ويقول لو على كده انا موافق ان ابويا يخرج وكان والله حزينا جدا على باقى اصدقاء والده الذين حكم عليهم ولا اجد فى النهايه الا حسبنا الله ونعم الوكيل وانتظروا لقاءات مع الحاج محمود ان شاء الله يحكى لنا عن هذه الفترة العصيبه وانتظرونا ونشكر كل من ساهم معنا وكل من شاركنا فى الدفاع عن الحاج محمود وباقى المعتقلين

اخوكم
فاروتا المصرى
بعد الحريه لعبد الجواد الحريه لمصر

الأحد، ٢ مارس ٢٠٠٨

وماذا بعد؟

السلام عليكم
اولا عذرا على التاخير فى ملاحقه الاحداث والمستجدات وكتابه جديد البوستات ولهذا عده ملاحظات اود ان احتفظ بها لنفسى بالذات
===================================--------------=====================
الاخوة والاخوات قراءة فى تاجيل المسرحيه العسكريه تقديم نهايه هذه العمل الدرامى الفاشل الذى كتبه والفه واخرجه عاطف بيه الحسينى افشل ممثل وافشل كاتب ومخرج
تكلم الكثير على التاجيل على ان النظام اول مرة فى تاريخه يواجه مثل هذا الموقف الحرج الذى وضع نفسه فيه
فكان كل محكمه عسكريه سابقه تتم فى السر ودون علم الشعب ولا العالم كله
اما هذه المرة فشاء المولى عز وجل ان يفضحهم فى العالم كله
قرار التاجيل ربما كان كما قالوا لاعطاء الجماعه فرصه لحسم امرها فى الانتخابات المحليه اى يعتقدون ان الجماعه قد تعقدد معهم صفقه فاشله بان تقوم بالتراجع عن دورها الاصلاحى فىة المجتمع نظير ان يتم الافراج عن الاخوة الربعون
وقد يكون قرار التاجيل نابع من ان التهم لم تثبت على الاخوة لذلك لم يجدوا ما يبرروا به الاعتقال الا اخذ فرصه لالتقاط الانفاس (ربنا يقطع نفسهم )
واما ان يكون قرار التاجيل ذياده فى اجراءت التعسف التى تتخذها موسسه ظلم الدوله فى ارهاق الاسر الاربعين اكتر واكتر
وعلى العموم ايا كان قرار المحكمه وايا كانت اسباب التاجيل فان الله قد قدر ولابد من نفاذ قدر الله على عباده وطوبى للصابرين
الذين اخرجوا من ديارهم الا ان يقولوا ربنا الله
نتمنى من كل قلوبنا ان يجرى الله الحق على لسان القاضى يوم 25*/3
ويفك اسر كل اخواننا ويعود كل واحد لبيته وعمله واولاده

الثلاثاء، ٨ يناير ٢٠٠٨

السلام عليكم من البلد

السلااااااااااااااام عليكم ورحمه الله وبركاته
احبتى فى الله كيفكم؟؟
الحمد لله العبد لله فى البلد
بعد قضاء 63 يوم خارج البلاد لاداء فريضه الحج والحمد لله ربنا من علينا واديناها
وكمان اشتغلت الشهرين وربنا كرم بمبلغ يعنى مش بطال سديت بيهم الدين اللى كان عليا
الحمد لله على ايه حال
وان شاء الله قريبا تقرؤا احداث الشهرين خلال رحله الحج
اخوكم

الاثنين، ٢٦ نوفمبر ٢٠٠٧

مصر ام الدنيا

السلام عليكم
اول تدوينه من قلب الاراضى السعوديه
والله مصر وحشتنى جدا جدا
وكل اهلى واحبابى واخوانى واخوانى المدونين وحشونى جدا وكل زوار المدونه
الحمد ربنا من عليا وعملت عمرة
فاضل الحج
اول ما احج ارجع مصر على طول ان شاء الله
واشوفكم بخير ان شاء الله
وعلى فكرة
مصر ام الدنيا
مصر ام الدنيا
واحد حلو يسالنى مصر ام الدنيا ليه يا فاروتا؟؟
اقوله كفايه حاجه واحده انك لو صحيت بالليل عطشان تلاقى الحنفيه تشرب منها؟
يعنى الميه بتاعته النيل لوحدها كفايه علينا حافظوا عليه يا مصريين
هنا مياه كلها املاح ربنا يعافينا
كفايه انك فى مصر رغم الظلم والقهر اللى احنا فيه فى مصر برضه مصر ام الدنيا
تحياتى لاخوانى واخواتى
سلامى لاهلى وخلانى

الأحد، ٢١ أكتوبر ٢٠٠٧

يوم 19/10/2007

الجمعه 19/10/2007
هو تاريخ الخطوبه الرسميه
الدبل والشبكه وطبعا قراآة الفاتحه
والعاقبه عندكم ان شاء الله
=================
ان شاء الله مسافر لاداء فريضه الحج كمان كام يوم ان شاء الله تعالى
وربنا يستر والامور تمشى تمام
============================
احلى خبر بقى
===
===
===
=
=
=
=
واحد صاحبى وحبيبى جدا خطب
==
اول حرف من اسمه
مصرااااااوى اوى
==
الف مليون مبروك يا حبيبى

السبت، ١٣ أكتوبر ٢٠٠٧

عيد باى حال عدت ياعيد

السلام عليكم ورحمه الله
احبابى
كل عام انتم بخير
والله واحشنى
ايه اخباركم
يارب يكون عيد سعيد عليكم وعلى كل امتنا الاسلاميه
ويارب نتواصل تانى ونوقف ونقول للظلم لالالالالاا وللفساد كفايه
وربنا يفك اسر اخواننا المسجونين

الخميس، ١٣ سبتمبر ٢٠٠٧

كل عام انتم بخير

السلام عليكم ورحمه الله وبركاته


احبابى زوار المدونه واحبابى اصحاب الجدعنه

كل عام وانتم الى الله اقرب


كل عام وانت للجنه ارغب

كل عام وانتم بالف بخير

عذرا على التاخير فى البوستات
نظرا لانشغالى فى المحل ببيع الياميش والعطارة وربنا يتقبل منا ومنكم


وياريت نتواصل دايما

وكل عام وانتم بخير
الدعاء الجميل ده عجبنى اوى
اللهم هؤلاء أحبابي عيني لا تراهم فبعينك اللهم ارعاهم و فرج همهم و شكواهم و اجعل السعادة لا تفارق عيناهم و بحكمتك سدد خطاهم و اجعل الفردوس الاعلي في الاخرة هي دارهم و سكناهم و لا تحرمني يارب من لقياهم - كل عام و انت الي الله اقرب و علي طاعته ادوم

الثلاثاء، ٢١ أغسطس ٢٠٠٧

خير اللهم اجعله خير

خير اللهم اجعله خير

كاعااده امسكت بالتليفون لاطمئن على اولاد الحاج محمود فكبيرهم صديقى وصغيرهم اخى الصغير بفضل الله

المهم جاء صوت جميل وسئلته ايه اخبار والدك؟؟؟؟؟؟

رد عليا ولاول مرة الرد الذى انتظرةابويا اهوو ابويا جه !!!!!!!

انت بتقول ايه؟؟ابوك اخد افراج

ثم المشهد التانى انى بقدرة قادر لقيت نفسى عندهم فى البيت

ولقيت الحاج محمود لابس بدله سوده وزى القمر فيها

ااول حاجه عملتها انى شيلته على كتفى ولفيت بيه وسط الحضور اللى كان عددهم يتجاوز عده الاف

وانا فى وسط الفرحه دى لم اتذكر الا اخى وحبيبى سعد الشاطر لاهنئه لانى سمعت واانا شايل الحاج محمود انهم كلهم اخدوا افراج الحمد لله

وكلمت سعد وباركتله ومش فاكر بقى كلمت الشاطر خيرت ولا لاء
وبعدها صحيت قلت اللهم يارب يا منان حقق هذه الرؤياوبعد يومين كنت وسط الاخوة وحكيت هذه الرؤيا ولكم كان سعادتهم بها ودعوا الله جميعا ان تتحقق
اللهم يا ذا الفضل فك اسر اخواننا وردهم الى اهليهم ردا جميلا يا الله انك على كل شئ قديييير

اخوكم

الثلاثاء، ١٤ أغسطس ٢٠٠٧

البقاء لله

انا لله وانا اليه راجعون
البقاء لله
جدتى لامى توفيت اليوم
اللهم اسكنها فسيح جناتك
واغفر لها وارحمها
واجعل مرضها فى ميزان حسناتها

الأربعاء، ٨ أغسطس ٢٠٠٧

التاريخ يعيد نفسه

السلام عليكم
ازيكم يا احباب
واحشنى يا غالييين عليا
ربنا يكرمكم وجزاكم الله خيرا على التهنئه بالخطوبه
ويارب عقبالكم كلكم وعقبال كل مشتاق للجنه
اللهم امين
وشكر خاص لاخويه بيدو على انه عمل بوست مخصوص لموضوع الخطبه
ربنا يكرمك يا عبد الرحمن وتخطب انت كمان
----------------------------------------
طبعا انا الحمد لله مبسوط انى خطبت ومبسوط اكتر انى خطبت الانسانه دى
فاللهم لك الحمد كما ينبغى لجلال وجهك وعظيم سلطانك
-----------------------------------
الحمد لله خطيبتى انسانه ملتزمه جدا ومحترمه جدا وطموحه
الحمد لله
خريجه كليه تمريض اسكندريه
==============================
اما بخصوص العنوان
التاريخ يعيد نفسه من 30 سنه
فانا والدى راح يخطب من 30 سنه والدتى سنه 77 وسبحان الله نفس الشخص اللى استقبله لانه ولى امر العروسه كان هو نفس الشخص اللى استقبل والدى سنه 2007 وهو رايح يخطبلى لانه برضه ولى امر العروسه ازاى؟؟
والد العروسه يعنى حمايا هو عم والدتى يعنى فى مقام والدها لان والد امى يعنى جدى توفى قبل ما الخطوبه بتاعتها
تتم
سبحان الله بعد 30 سنه يتكرر نفس الموقف بس مع تغيير العريس والعروسه
=============================
والحمد لله اول مرة اروح للعروسه وقعدت اتكلمت معاها لقيتها عاقله جدا الحمد لله
وجيبتلها هديه كده خاتم كويس وعجبها الحمد لله وعقبال عندكم جميعا
وعقبالك يا مصراوووى انت وبيدو عبد الرحمن
اخوكم

الثلاثاء، ٣١ يوليو ٢٠٠٧

الحمد لله النت وصل

السلام عليكم
تحديث-
الحمد لله المشوار تم على خير وحصل نصيب
اللى عايز يهنى بقى يتفضل
وعقبال عندكم جميعا
-------
ازيكم يا اخواننا
والله واحشنى
معلش النت كان فاصل عندى 5 ايام متواصله
وربنا ما يخليكم تدخلوا نت بالدايل اب ابدا
لانه كان بيموتنى واانا قاعد
---------------------------
انا الحمد لله بخير
وان شاء الله هتسمعوا خبر كويس ان شاء الله قريب هنا بس انتوا ادعولى بجد
حاجه كده فيها يا دبله الخطوبه ومعازيم وبتاع
ربنا يسر لنا امورنا
--------===-------------==--------------

الاثنين، ٢٣ يوليو ٢٠٠٧

لقاء مع زوجه الحاج محمود

لقاء مع زوجه الحاج محمود عبد الجواد
اجراه
احمد فاروق
تصوير
عبد الرحمن وجدى

الأحد، ٢٢ يوليو ٢٠٠٧

دعوات اسرة الحاج محمود على الظالمين

كتبت اسرة الحاج محمود شكوى الى رب العرش
====================
لا سامحهم الله
رفض الوزير الانسان ان الاب يحضر فرح ابنته ......اول فرحته اول ضناه
حرموه من حضور زفافها ........ ربنا قادر على ان يذبقهم من نفس الكاس

ادخال السرور على قلوب الناس من اعظم الاعمال زى ما قال الرسول – عليه الصلاه والسلام
طيب وادخال الحزن والهم والبكاء والغم على الاولاد فى يوم الفرح –يبقى من اى الاعمال – ومين يتحمله – ومين يقدر يشيله
- الحاج محمود صدق لما قالوا ان الوزير انسان- قدم طلب عشان يجى فى الجورنال – لمسه انسانيه وعطف الداخليه – الحاج محمود قدم الطلب وانتظر ليوم الفرح وهيهات
بس والله الحاج محمود قدم طلب وشكوى لرب السماوات والارض – يحرم كل من حرم اب من حضور فرح ابنته – يحرمه من فرحته باحب الناس واعز الناس عليه ....
وعموما بسيطه – الدنيا سريعه – وهتخلص بسرعه ويبقى الحساب والموقف فى الآخرة – واضح انهم مش مصدقينه – ولاا هما متصورين ان النظام والجهاز هيحميهم – طيب هو يحمى نفسه من الجبارالمنتقم ---
وكان غيرهم كتير اشطر --- ان موعدهم الصبح اليس الصبح بقريب ----
قال ايه اصل الاب من الاخوان – وكمان من بتوع الاموال—
صدقوا وعملو المسرحيه وحولوها لعسكريه – معلش اصله شغل عسكر وحراميه

الأربعاء، ١٨ يوليو ٢٠٠٧

قاهرة المعز اصبحت قاهرة ابن عز

السلام عليكم
از يكم يا حبايب
العبد لله كان عنده مشوار فى العتبه يوم الثلاثاء
رحت ميعادى الساعه 10 وصلت 10.15 صباحا
علشان كان عندى مقابله
انتر فيو يعنى
كان دكتور عبد الحميد زغلول (عضو مجلس شعب) مقدم لى فى وظيفه يعنى وربنا يكرمه
المهم الراجل الحمد لله الى مفروض نقابله خلص اجتماع الساعه 3.15 قبل العصر
يعنى فضلنا ملطوعين من 10 الى 3 ننتظر الباشا اللواء
وفى الاخر كل واحد قعد جوا عنده دقيقتين
وبعد كده طلعت الحكايه لو فى نصيب يعنى عقد سنوى ويجدد تلقائى او يلغى حسب مزاج البشوات
==================
بعد كده نزلت ازور اخويا وحبيبى الكبير اوى
وقعدت معاه فى بيته وربناا يتم شفائه على خير ان شاء الله
واتغديت معاه بصراحه اهل كرم
كانت جلسه ممتعه فعلا
مع انى معرفش مصراوى غير من كام شهر الا انه فعلا اصبح اكتر من اخ وكانى اعرفه من سنين
واشهد الله انى احبه فى الله
ربنا يحفظك ويشفيك ويثبتك ويجوزك يا دكتووووووووووووووور
=======================================
جار مصراوى لما عرف انى جاى انتظرنى
لما العبد لله اتاخر فى المقابله
راح اخونا شهاب نزللى العتبه
ربنا يكرمك يا شهاب ويثبتك وينفع بيك
==================
اكتر حاجه فعلا زعلت منها ان كان فى مؤتمر فى نقابه المحامين
وانا كنت جنب منها ومعرفش
كان نفسى فعلا احضره
بس مافيش نصيب
اخوكم
بالله عليكم ادعولى يا جماعه الخير

الجمعة، ١٣ يوليو ٢٠٠٧

يوم خلسه فى وسط الجلسه

الساعه الواحده بعد منتصف الليل يوم الاربع
جالسين عند واحد صاحبنا دكتور (المكان اللى بنسهر فيه كل يوم)
ان شاء الله ناويين ننزل بلطيم نغير جو لمده يومين ولا حاجه
اتفقنا نتقابل يوم الخميس عند صلاة الظهر نصلى ونتوكل على الله
فجأه وبدون مقدمات
يالا بينا حالا؟؟؟؟
يا رجاله ممكن؟؟
خلاص كل واحد يروح بيته يجيب حاجاته ويجى بسرعه
وبالفعل
نزلنا الساعه 2.30 بالليل
وصلنا الحمد لله بلطيم الساعه اربعه الا ربع
نزلنا اقرب مسجد
صلينا الفجر وبدء اليوم
كان لازم منه اليوم ده
لازم نغير الروتين اليومى اللى احنا عايشينه
لازم نفك نفسنا شويه يا اخواننا
؟؟؟؟؟؟؟؟؟؟؟؟؟؟؟؟؟؟؟؟؟؟؟
علشان نقدر نواصل مسرة الحياة
والحمد لله رجعنا الجمعه قبل الصلاه
وعقبال عندكم
الحمد لله كنا 6 مننا اتنين اخوان == العبد لله ودكتور كمان= والباقى اصاحبنا برضوا محبين
ورجعنا بالسلامه من غير اخواننا البعدا فى امن الدوله ما يسمعوا بينا كانوا ممكن يعملوا فينا زى بتوع الهانوفيل بس ربنا ستر
تحديث
على فكرة العبد لله قاعد من غير شغل يعنى الروتين اللى انا بتكلم عليه هو== نوم ثم اكل وشرب ثم نت ثم نوم يتخللهم اوقات الصلاه
===================================
الف سلامه لاخويا وحبيبى الغالى ابو مقام عالى
مصراوى اوى
واتم الله شفاءه على خير ان شاء الله
=================
اخونا عبد الرحمن وجدى يطلق مدونه شهد الكلام - الحريه لعبد الجواد
زورها وباركوله
اخوكم

الاثنين، ٩ يوليو ٢٠٠٧

كلمه الدكتور محمد فضل عضو مجلس الشعب

الأحد، ٨ يوليو ٢٠٠٧

السبت، ٧ يوليو ٢٠٠٧



السلام عليكم


عندما تشعر ان كل الواقفين بجوارك هم اخوتك من النسب بل اقرب الى نفسك من اخوتك من النسب


عندما يقف معك كل من حولك دون ان تكون لهم مصلحه دنويه فى يوم فرحك


عندما تشعر وانت ترى وجوها لاول مرة انك تراها كل يوم وترها منذ زمن


عندما تشعر مريم محمود عبد الجواد ان كل من حضر فرحها وكل من لم يحضر بسبب او باخر انه والدها تماما مثل محمود عبد الجواد


عندئذ تعرف انك فى جماعه الاخوان المسلمين!!!!؟


نعم انه يوم ولا كل يوم انه يوم سيشهد له التاريخ انه يوم مميز


هذا اليوم الذى تم فيه زفاف مريم بدون ان يكون والدها موجود معها ومنعه الظالمون من ان يشهد مراسم زفاف ابنه الكبرى


ولكن رغم غياب الحاج محمود وهو خلف الاسوار الا انه ارسل رساله مكتوبه بخط اليد الى الجميع الى ابنته وعريسها والى الحضور والى كل فرد فى هذه الدعوة الابيه


ان شاء الله تقراؤها قريبا هنا


بدء اليوم بعد صلاه الجمعه مباشرة بحضور الاخوة والاخوات للتهنئه من كل مكان


وكما هو الحال فى مصر تم تناول طعام الغذاء وكما هى السنه الشريفه


وحضر جميع اخوة ادكو ومعهم اخوة من رشيد واخوة من اسكندريه




اما المفاجاءه اننى رايت زوجه الحاج حسسن مالك هى وابنتها الاخت خديجه بعدما قاموا بتهنئه العروس وهم يغادرون البلد ليرجعوا الى القاهرة التى تبعد عن بلدنا بمئات الكيلو مترات ؟؟؟؟


لم يكن غريبا ان ترى اخوة اسكندريه ورشيد وادكو والقاهرة وهم يتحدثون الى بعضهم البعض وكانهم كل يوم يتقابلون او انهم تقابلوا من قبل


وحضر ايضا عدد من اعضاء مجلس الشعب


مثل الدكتور محمد فضل نائب كفر الشيخ الذى القى كلمه فى الحفل سنضعها ان شاء الله هنا


والدكتور عبد الحميد زغلول نائب ادكو ورشيد


كما حضر الاستاذ الكبييييير محمد حسين الذى قام وسلم عليه اغلب الحضور وكذلك بعض اعضاء مكتب الارشاد


كان يوما تاريخيا لم ينقصه الا حضور نجم الحفل الغائب الحاضر فى قلوب كل الاخوه


الحاج محمود


كما وصلت برقيات تهنئه من المرشد وبعض اعضاء مجلس الشعب واعضاء مكتب الارشاد الذين لم يتمكنوا من الحضور


ونوافيكم بالصور والفديهوات بعد قليل


المهندس ابراهيم السيد والاستاذ محمد ابراهيم والاستاذ جمعه امين
الاستاذ صبحى صالح حرص على الحضور ايضا

الاستاذ محمد حسين والشيخ سليمان والحاج سيد خميس والاستاذ عبد السلام حراز
الدكتور ابراهيم الزعفرانى

الثلاثاء، ٣ يوليو ٢٠٠٧

اعتــــــــــــــــــــــــــــــــــــــــــــذار

اعتــــــــــــــــــذار
اولا بعتذر اولا على البوست ده بس كان لازم اعمل كده انا عيشت يومين يا خونا ربنا هو اللى عارف انا كنت فيهم عامل اول مرة احس انى ممكن اخسر حد بحبه ؟؟؟؟ بحبه دى كلمه قليله عليه===استاذى الكبييييييييييييييراول واحد علمنى يعنى ايه جنه ونار اللى حفظنى اول كلام من كتاب الله==ايام الاشبال من 18 او 19 سنه======== انا حقول ايه اللى حصل علشان محدش مفكرنى انى بعمل اكشن علشان اشوف رد الفعل بتاع الناس
مش انا الحمد لله اللى يعمل كده بس بعد اذنكم هنزل البوست ده يوم السبت
ان شاء الله
اخوكم فىالله فاروتا
كل الشكر لاخى الكبير nesrelsharke@hotmail.com
وهرد عليك يا اخى الكبيييييييييييييييير
السلام عليكم

السبت، ٣٠ يونيو ٢٠٠٧

حاجه غريبه سبحان الله

سبحان الله ده نصيب
هو فى ايه ياعم
اهو ده اللى حصل
خير يا عم قول بقى
واحد جارنا فرحه انهارده السبت
وساعه الحنه يوم الجمعه باللييل ؟؟
ابوه توفى
سبحان الله
حاجه متحلصش غير واحد فى المليون
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
مش لاقى كلام اقوله
غير انا لله وانا اليه راجعون

الخميس، ٢١ يونيو ٢٠٠٧

اخيييييييييييييييييييييييرا زياااااااارة طرة

اخيرا وبعد طول انتظار
قمت بزيارة الحاج محمود فى مزرعه طرة
ابدا الحكايه من الاول ومش هطول عليكو ان شاء الله
اتحركنا من البلد انا وعبد اللطيف ابن الحاج محمود حوالى الساعه تلاته ونص قبل الفجر
علشان كان فى عربيتين رايحين جنب المزرعه على طول واخدونا معاهم
المهم وصلنا هناك حوالى الساعه سبه سبعه ونص كده
اتمشينا لغايه البوابه ودخلنا الساعه تمانيه
الساعه تمانيه ونص كنا امام بوابه الزيارة جوه
واول ما كان موجود معانا فى الطفطف اولاد المهندس خيرت الشاطر "الاخوات" وابنائهم الصغار
الولاد الصغيرين قعدوا ينادوا على العسكرى علشان يفتح لهم ""افنح ياعمو ابو سعيد عايز اشوف بابا" ده اعتقد سلمان وانس احفاد الشاطر "
المهم دخلنا حوالى الساعه تسعه ميعاد الزيارة وده كله والامر ميخلاش من شويه غلاسه فى التفتيش
المهم دخلنا مكان الزيارة مكان ضيق ومش ولابد
مكان لا يليق بارقى وانقى واغلى ناس فى مصر
اول واحد دخل علينا مهندس ايمن عبد الغنى ربنا يكرمه سلمنا عليه طبعا استقبلنا باهلا يا اخونا كلمته الشهيرة
وتانى واحد كان الحاج حسن مالك ربنا يكرمه دخل وسلم علينا وعرفته بنفسى
وبعد كده بقيت الاخوة الا ان جاء الحاج محمود انتفضت من مكانى لاسلم عليه
ست شهور ولم اره وكان الحمد لله لقاء تمام الراجل اخدنى بالحضن يجى نص ساعه

وقعدنا وجه عبد المنعم محمود وعرفته بنفسى او بممعنى اصح الحاج محمود كل ما حد يجى من جوة او برة يعرفه عليا ويقوله ده فاروتا المصرى والحمد لله كان فى ناس تعرفنى من غير ماتشوفنى من خلال الحاج محمود ومن خلال الشعر اللى كنت ببعته طرة مع الزيارات
وبعدها الاسد البطل المهندس خيرت الشاطردخل وقمت سلمت عليه وانا بسلم عليه اخدنى بالحضن قلتله فى ودنه " فاروتا المصرى" قالى ازيك يا ابو حميد الف شكر عالكلام الحلو اللى انت بتبعته هنا
الله على هذا الرجل ربنا يكرمه
وبعدها كتير من الاخوه فك الله اسرهم
اما بقى المهندس احمد النحاس وزوجته ابنه الاستاذ الكبير محمد حسين فلهم فى قلوب الناس هناك مكانه كبيرة
ومهندس سعيد سعد كان قاعد معانا هو وابنه الدكتور وبعدنا قاعد مهندس احمد شوشه ابو معاذ" المؤذن الصغير".....0
وكمان ابو يوسف او الدكتور ضياء فرحات وابو احمد عبقرينو ربنا يثبتهم جمعيا
وكمان الشيخ سيد معروف والدكتور العالمى خالد عبد القادر عوده ابن الشهيد عبد القادر عوده
ناس والله مافى زيهم فى البلد دى
انا مش عارف
==================
ناس يقعدوا فى زنازين وعنابرجوه السور
فيهم مهندس وعالم وتاجر وكمان دكتور
والحراميه قاعدين فى بيوت وقصور
يقتلوا فينا يبيعوا اراضينا من غير دستور
يحرقوا احلامنا يسرقوا ايامنا سنين وشهور
بالذمه ده اسمه كلام ياشعبى المقهور
ياشعب كل امله يعيش مستور
اصحى وفوق بكرة الدايرة عليك هتدور
اصحى واقوم مالك كده نايم مخمور
سيبك من الضلمه وعيش وسط النور
اصحى بكرة هتنام كتير فى القبور
عايش ليه خايف ليه من شويه قشور
================
بعد ده كله كان وقت الزيارة محدود ومكان الزيارة غير صالح للاستخدام الادمى
وطبعا حال الاخوة لايخفى على احد حيث المتاح ليهم يتمشوا فيه كل يوم وقت بسيط جدا
داخل العنبر طول النهار
انتظروا الجزء التانى ان شاء الله

الثلاثاء، ١٩ يونيو ٢٠٠٧

وماذا بعد ال سته وعشريين

22/6
يوم الجمعهالقادم 22/6 الذكرى السته وعشرين ليا
سته وعشرين سنه وانا هنا
عملت ايه لهناك
يا رب سامح واغفر يا ارحم الراحمين

السبت، ١٦ يونيو ٢٠٠٧

الصورة دى انا اللى مصورها بتليفونى لما كنت عالبحر عندنا فى البلد كنت مخنوق صراحه من كل حاجه
دى بقى المراكب اللى عالبحر بعد قرار وقف الصيد لمده شهر ونص ربنا يوقف بحال اللى اخدوا القرار ده

اولا بشكر المدون المحترم اوى مصراوى على التاج وجارى الرد عليه ان شاء الله
==========================================

امبارح بعد الضهر حسيت انى مخنوق وزهقان شويه بس شويه كتير خاااااالص

يعنى هما شويه مشاكل كده وان شاء الله يخلصوا

المهم سحبت الشنطه وحطيت فيها شويه هدوم والباسبور ومعرفش رايح فين

بس والدتى وجدتى منعونى وخلاص

المهم اخدت نفسى وعالبحر اقعد شويه مع نفسى

رحت لقيت الجو هادى يدوب كام واحد على كام صياد

لاقيت الراجل اللى بياجر كراسى وشماسى واقف

قلتله هات كرسى وشمسيه يا عم

الراجل راح جايب كرسى وشميه وتربيزة

جه يمشى قلتله حاسبنى الاول علشان ممكن امشى فى لحظه

قالى ماشى عندك الحسااب ........ يبقى سبعه جنيه ياباشمهندس

نعم ياحاج ليه سبعه قالى خلاص ياعم يبقوا سته بس

قلتله انا مش عايز الترابيزة انا كلها نص ساعه وماشى رحت مطلع تلاته جنيه وعاطيهموله



هاااا ينفعوا لا يا استاذ خلاص ياعم مش عايز حاجه انا ماشى

الراجل قالى خلاص هات التلاته جنيه

اصل العبد لله هو الوحيد اللى كان ماجر شمسيه وكرسى والظاهر الراجل عايز يستفتح

المهم قعدت شويه وسقعت من الهوا رحت قاعد فى الشمس وزعلت انى دفعت تلاته جنيه





=================================

الاسعار بقت نار

لا دى فعلا دمار

بجد من غير هزار



بحكم ان احنا شغالين فى الزيت والسكر والسمنه والشاى والصابون فى المحل

طبعا اكتر ناس بتحس بتغير الاسعار احنا

والناس غلابه بس هيعملوا ايه



واحد كل مايسالنى على حاجه اقوله زادت وبقت بكذا

الراجل زهق راح قايلى الشعب احسن حاجه يشوفلهم بلد تانيه يقعدوا فيه

طبعا قلتله والله احسن حل علشان الحكومه ترتاح

لا حول ولا قوة الا بالله

مش عارف اقول ايه والله
بس هى دى الدنيا
من كام يوم وفى البلد عندنا حكايه غريبه
الا وهى موت الشباب المفاجئ

ثلاثه فى ريعان الشباب ماتوا
واد محامى بعد ماجه من المحكمه قالهم فى البيت حضروا الغدا بعد ما طلع يغير هدومه ما نزلش ياكل بيشوفوا هو اتاخر ليه
لاقوه قد فارق الحياة
بدون سبب او مرض او ..... ؟؟ سبحان الله
لكل اجل كتاب
والشاب التانى اللى بيقعد على باب المسجد اللى بنصلى فيه بيلمع احذيه
وهو اساسا شغال فى البلديه
بينضف الصرف وحاجات من دى نزل فى فى احدى الحفر ينضفها اتخنق مات بععدها بكام يوم

3- دى بقى واحده جوزها صاحب والدى وهى صاحبه والدتى وجارتنا
وجوزها بيشتغل فى ايطاليا وبيرجع فى الاجازة
رجع من كام يوم وشفته وقابلته وسلمت عليه فى جنازة واحد من البلد
وبعد كام يوم اخد زوجته وسافر مع ولديه الصغيرين بعد كام يوم سمعنا ان زوجته ماتت
سبحان الله بتفكرنى بقصه ملك الموت مع الراجل اللى كان قاعد عند سيدنا سليمان
لما راح قبض روحه فى الهند

تقعد فى مصر ده كله وتروح ايطاليا تموت هناك

انا لله وانا اليه راجعووون

الأحد، ١٠ يونيو ٢٠٠٧

الحاج محمود فىفرح احد الاخوة

بسم الله


كعادته دايما ما يكون موجود فى الصفوف الاماميه لاى مناسبه فى البلد عامه والاخوان خاصه فهو الاخ الحنون الاب العطوف
الذى تجده دايما معك فى كل المناسبات


هذه المرة فى فرح اخونا الحبيب ا مسعد
حاليا ابو عبد الله____
3 0/4/1999

مدينه ادكو
كعادته امسك الحاج محمود بالمايك وتحدث الى الحضور وتكلم بصوته الثابت المعهود فى كل العهود
وقال : ان الاسلام دين الفرح والمرح فى غير معصيه الله
وان يجب على المسلم ان يلتزم بشرع الله حتى فى يوم عرسه فلا اختلاط ولا تبرج ولا اسراف ولا لاظهار لزينه الزوجه امام الغير
واشار الاستاذ الفاضل ان ما نشهده اليوم )( يقصد يوم فرح اخونا)
هو نموذج لفرح اسلامى لاخ من دعوة الاخوان المسلمون
ومن كلمات الاستاذ الفاضل الخالده
:-
ان المشكله التى تعانيها بلدنا ليست فى قله الموارد او ضعف الامكانيات ولكن هناك قله وندرة فى الضمائر والايدى النظيفه
-----------------------------

حقا يا استاذى هاهو اليوم بعد ثمانى سنوات يعتقلك النظام الظالم لانك من هولاء اصحاب
الايدى النظيفه والضماير السليمه

طلب من الاخوة فى ادكو او اى شخص على معرفه بالحاج محمود اذا كنت تملك صورا او اى شئ الحاج محمود نرجو ارساله الى الايميل او تسليمه باليد الى فاروتا المصرى
Egyptain Farota

السبت، ٢ يونيو ٢٠٠٧

عبد المنعم محمود

الى حبيبى عبد المنعم محمود
الى الذى علمنا معنى الصمود
الى الذى قتل فينا الجمود
الى الذى احيينا فينا الجهود
الى الذى حطم لنا القيود
الى الذى لم يخلف معانا العهود
الى الذى اصبح الظلم عدوة اللدود
الى الذى خرج بنا خارج الحدود
الى عبد المنعم فهد الفهود
الى عبده اسد الاسود
مبروك عالحريه وفك القيود
اخوك فاروتا المصرى اللى كان عليك مخضوض

الثلاثاء، ٢٩ مايو ٢٠٠٧

آخر عهدى بالحاج محمود

والله والله وحشتنا ياعم الحاج



كثيرا ما كانت هناك لقاءات مع الحاج محمود

لكن كان هناك لقاء بالصدفه مع الحاج محمود فك الله آسره هو واخوانه



كان هذا اللقاء فى جنازة احد اهل البلد



فقابلته عند اخد العزاء فسلم عليا كالمعتاد بطريقته الشهيرة بهذا الحضن الابوى الذى يشعرك انه ابوك فعلا



وكان هذا اللقاء بعد ان من الله عليا واطلقت اللحيه



وكان الحاج محمود دايما ما ينادينى قبل اللحيه ب (الشيخ احمد)



وهذه المرة قالى ايوا كده علشان تبقى رسمى يا شيخ احمد



وكان فك الله اسره لازم يسالنى عن والدى لانه يحبه جدا ووالدى الحمد لله صديقه ويحبه ايضا ودايما ما يسالنى عنه وعن اخبارة






ودايما العبد لله يكون من اوئل الناس اللى تروح للحاج تسلم عليه بعد مايجى من بعثه طرة
وهذه الصورة العيد لله هو اللى مصورها فى منزل الحاج محمود بعد ان وصل بالسلامه من اخر بعثه قبل الاحاله بشهور مع دكتور عبد الحميد زغلول عضو مجلس الشعب والحاج سيد خميس احد رموز الاخوان فى ادكو




فك الله اسره واسر جميع اسرانا واسرى المسلمين



اللهم امين






الثلاثاء، ١٥ مايو ٢٠٠٧

شويه حاجات

اول حاجه طبعا
حسبى الله ونعم الوكيل فى اللى حصل
حكم بمنع تنفيذ قرار الرئيس
وبعدها بكام يوم حكم من محكمه غير مختصه وشويه مستشارين لا يخافون الله وتابعين للسلطه التنفيذيه بقبول طعن الحكومه
وطبعا برضه حسبنا الله ونعم الوكيل
تانى حاجه
بصراحه انا مش فاضى ادون او اكتب شعر فعلا
لانى اشتغلت
الحمد لله
اشتغلت فى التجارة مع والدى
طول اليوم بره وطبعا برجع تعبان مش بشوف حد ولا حتى المدونات بتاعتى غير نص ساعه تقريبا يوميا
بس بالله عليكوا ادعولى
تالت حاجه واهم حاجه
انا خلاص زهقت يا ناس عايز اخطب واتجوز
طبعا واحد فالح يسالنى طيب وايه اللى مانعك ما تتجوز
اقوله ما اللى ايده فى الميه مش زى اللى ايده فى النار
يعنى شويه ظروف مؤقته ان شاء الله
وخلال ايام باذن الرحمن هعلن انا خطبت بقىىىىىى
رابع حاجه
حاجه برضه مهمه
الواد مصراوى اوى وحشنى
واخويا الحبيب شهاب حبيب الشباب واحشنى
واخويا الحبيب سعد الشاطر
واحشنى جدا
وطبعا عبد الرحمن عياش اللى مش بكاش

الجمعة، ٤ مايو ٢٠٠٧

هناك فرق!!!؟


سيدى الرئيس اولا الف مبروك على كتب كتاب ابنك جمال
ثانيا يا ريس وده المهم اكيد حضرتك فرحان اوى زى ما هو مكتوب علشان كتب كتاب ابنك وده شعور طبيعى لاى اب بيحب ابنه او بنته
وكمان حضرتك عملت كتب الكتاب وعزمت 400 واحد برضه زى ماهو مكتوب وكنت مبسوط اوى وعديت عليهم نفر نفر تسلم عليهم وتشكرهم انهم حضروا ودى طبعا عاده المصريين الجدعان
واكيد طبعا كنت حضرتك وكيل ا لعريس
بس احب اقول لحضرتك خبر ممكن تكون سيادتك مسمعتش عنه
انه فى يوم الجمعه 6 ابريل يعنى من شهر تقريبا برضه كان فى كتب كتاب
كتب كتاب مريم ابنه الحاج محمود عبد الجواد طبعا حضرتك متعرفش مين ده ؟؟
ده يا سيدى الرئيس واحد من الناس اللى حضرتك امرت بتحويلهم الى محاكمه عسكريه
وطبعا تم كتب الكتاب دون حضور الحاج محمود المناسبه وبمعنى اصح يعنى مسلمش على المدعويين ولا كان هو وكيل العروسه الى هى بنته
وكل ده ليه ؟
علشان هو واحد من الناس اللى عايزة البلد كويسه علشان هو بيعمل حاجات ترضى ربنا
علشان هو من جماعه كل هدفها اقامه شرع الله فى ارضه
ناس عايز ترجع لنا كرامتنا الى اتسرقت مننا
؟؟؟؟؟؟؟؟
بس لعلم حضرتك مريم بنت الحاج محمود اتعملها احتفال احسن واجمل من اى احتفال بتاع حد تانى
اتعملها احتفال بين اطهر ناس فى البلد احتفال مريم يا ريس مكنش معازيم وفرح وحضور ؟لالالا
احتفال مريم كان فى القلوب الطيبه الطاهرة اللى مع ابوها فى طرة ايوااا اتعملها احتفال فى السجن ؟؟
بس للاسف ده مش سجن ده مكان التقت فيه قلوب على الحب مكان بيلم احسن ناس فى مصر
-------------------
اخيرا سيدى القائد العام للقوات المسلحه ما ذنب مريم ان يكتب كتابها دون ان تكون فى حضن ابوها ودون ان يكون ابوها هو وكيلها
ولنماذا تسافر من بلدها ادكو اللى عالبحر الى القاهرة كل هذه المسافه علشان تتحتفل بكتب كتابها هى وعريسها فى السجن مع ابوها؟؟
هل هذا حرام ام حرام؟؟
انا اعتقد انه حراااااااام!!!!!!؟
وما ذنب ابوها ان يحول الى محكمه عسكريه؟؟
وما ذنب الشعب ان يكون بلا كرامه؟؟
مسابقه الى الزوار الاعزاء
انتوا فاكرين المسابقه بتاعت الفروق السبعه الى فى صورتين متشابهتين؟؟
انا بقى عايزكم تتطلعوا سبع فروق فى الصورتين اللى فوق
بس من غير ما نغلط ولا نعيب فى حد
؟؟؟؟؟؟؟؟؟؟؟؟؟؟؟؟؟؟
77777777

حسبنا الله ونعم الوكيل


السبت، ٢٨ أبريل ٢٠٠٧

على فكرة والله انا بهزر ده محصلش انا لسه ملقيتش حد اخطبه ادينى لسه بدور على اخت تستحملنى بس وربنا يكون فى عونها ادعولها
-------------------------
رحت اخطب الاخت نوارة
ابوها قاللى عندك بيت ولا عمارة
شغال فين فى بنك ولا فى السفارة؟
ابوك مين وزير ولا حتى وكيل وزارة؟
عندك عربيه يعنى بالعربى سيارة؟
قلت ياعمى انا احمد ومعايا بكالريوس تجارة
وابويا الحاج فاروق اكبر تاجر عطارة
وانا شغال معاه وبساعده فى التجارة
والشقه جاهزة يدوب عالمحارة
يعنى فاضل فيها السباكه على كام حتته نجارة
وهركبلها الكهربا واعملها احسن إنارة
وعاملها على كل شباك اجمل ستارة
قالى انت جاى تهزر روح بعيد اللعب فى الحارة
انا عايز ليها واحد اكون صايده بسنارة
يكون معاه فلووس ويكون شايلها فى الشكارة
----------------------------
هو ده فكر الاباء اومعظم الاباء الا من رحم ربى
بدل ما يجوز بنته لواحد يحافظ عليها ويكون بيتقى الله واول ما يساله يساله عن دينه واخلاقه
زى الرسول صلى الله عليه وسلم ماقال
--------------
لا بيساله عن شغله وابوة وفلوسه الخ الخ ....؟
وربنا يستر على الشباب بجد والله
انا على احر من الجمر فى ا نتظار تعليقاتكم المهمه فى الموضوع
فاروتا المصرى بتاع العطارة
على فكرة العبد لله مهندس كمبيوتر مع ايقاف التنفيذ
ومبرمج بلغه سى شارب و اس قيو ال داتا بييز بس حاليا شغال فعلا فى التجارة مع والدى
ليه؟ لانى حبيت التجارة احسن من البرمجه سبحان الله هو كده

الجمعة، ٢٧ أبريل ٢٠٠٧

الثلاثاء، ٢٤ أبريل ٢٠٠٧

ان شاء الله نكون عند حسن ظن سيادتكم

بعد قرار عمل مدونه للحاج الفاضل محمود عبد الجواد
قررت انى ادون هنا بقى لنفسى يعنى حاجات شخصيه كنت حابسها هنا علشان دى مدونه مشتركه
الان ادون حاجات شخصيه
وربنا يستر بقى
وتعجبكم ان شاء الله
بس انا زعلان منكم شويه اااه منك انت كمان ايوا انت؟
علشان مافيش غير واحد او اتنين بس اللى بيعلقوا
هوانا لا سمح الله بقولكم علقوا على الشاى
لا طبعا علقوا على البوست
وتعليقه قليله تمنع بلاوى كتيرة
هو انا هشحتها منكم
ربنا يكرمنا كده كلنا
اللهم امين
وانتظروا ان شاء الله شويه شعر طازة من الشعر النص كم اللى انا بكتبه
وجزاكم الله خيرا على الاطاله وعلى اى حاله وعلى المدونه اللى مش بطاله وعلى كمان الاقاله
اخوكم
فاروتا المصرى

الاثنين، ٢٣ أبريل ٢٠٠٧

خبر مهم

تم تخصيص مدونه (من بابها)
للحاج محمود عبد الجواد وهذا هو اللينك الخاص بها
http://freegawad.blogspot.com/

السبت، ١٤ أبريل ٢٠٠٧

حفل فى المزرعه


تشهد مزرعه طرة اليوم السبت 14/4/2007 الحفل الخاص بكتب كتاب الاخت مريم محمود عبد الجواد على الاستاذ طارق دويب


بارك الله لكما وبارك عليكما وجمع بينكم فى خير

الجمعة، ١٣ أبريل ٢٠٠٧

تاااج

تاااج جديد
ماذا استفدت من حمله اعتقال االاخوان الاخيرة
يعنى هل استفدت معنويا
كسبت اصدقاء جدد
عرفت حاجات مكنتش عارفها
يعنى حاجات من دى
بمرر التاج لكل من
عبد الرحمن عياش
مصراوى اوى
شهاب الازهر
سعد الشاطر (شفاه الله وعافاه

محمود سعيد
ومنتظر ردودكم وتعليقاتكم
فاروتاااااااا

الأربعاء، ١١ أبريل ٢٠٠٧

الخميس، ٥ أبريل ٢٠٠٧



تشهد مدينة إدكو اليوم الجمعه 6 ابريل عقد زواج الآنسة مريم
كريمة الإصلاحي المصري
الأستاذ محمود عبد الجواد
والذي يحاكم عسكرياً علي يد النظام المصري الغاشم
يأتي هذا اليوم الذي أنتظره الوالد الأسير منذ سنوات طويلة
لتكتمل فرحته بإبنته وقرة عينه
كم ينتظر الوالد - أي والد - هذا اليوم
كم يحلم به
كم يمني نفسه منذ أن تأتي ابنته إلي الدنيا باليوم الذي يراها كما يقولون فيه " عروسه " تزف إلي عريسها
مريم هي الابنة الكبري لرجل الأعمال محمود عبد الجواد
ولدت في1/1/1987وهي طالبة بكليه التربيه جامعه اسكندريه الفرقه الثالثه


___________________
إنه النظام المصري الفاسد المحتل الذي ينتقم من مواطنيه ويتحدث عن المواطنه
يظلم ويتحدث عن العدالة
ورغم ذلك
لن تتوقف مسيرة الحياة
وستنتهي هذه الحقبة السوداء من تاريخ مصر عن قريب
وسيفرح حينها محمود عبد الجواد بإبنته مريم وبأبنائها إن شاء الله
سيفرح محمد مهنا حسن بمولده عبد الله الذي أتي إلي الدنيا وهو خلف الأسوار
والفرح الأكبر ليس في هذه الدنيا - وإن كان المؤمن لا يحرم منه _ وإنما الفرح الحقيقي في دار السعادة الحقيقية
" ويومئذ يفرح المؤمنون "
خالص تهانينا لأختنا مريم
ولعريسها الأستاذ طارق محمد دويب ولكل أل عبد الجواد
للعلم
يقام حفل مماثل السبت بعد القادم بمشيئة الله في " قاعة " الزيارة بـ " مزرعة " طره
وللتهنئة يمكنكم
إرسال رسائل علي البريد الإلكتروني
gawadhony@yahoo.com
أو رسائل قصيرة علي
0124691996
0123227050
مع توضيح مدينتك وبلدك


شكرا لاخواننا فى مدونه انسى


ملحوظه صغيرة


برقيه تهنئه من


اخوكم احمد فاروق


فاروتا المصرى
عقبالى يااااااااارب

الثلاثاء، ٣ أبريل ٢٠٠٧

فى حب رسول الله


ابدا كلامى بالسلام والصلاه
على نور عينى حبيبى رسول الله
عليه اذكى سلام وافضل صلاه
فى قلبى حبه ما اغلاه
وعلى لسانى ذكره ما احلاه
واسير دايما على خطاه
ده فلبى عليل وهو دواه
ربنا على كل الخلق اصطفاه
ورفعه بين البشر وعلاه
وسبحان من حفظه وحماه
لما كان فى الغار وابوبكر معاه
قال الرسول احنا اتنين وتالتنا الله
ولما سراقه مشى فى الصحرا وراه
قاله الحبيب ارجع واساور كسرى ليك مهداه
وفى عهد عمر تحقق وعد رسول الله
يارب صلى عليه فى الارض والسماء

الاثنين، ٢ أبريل ٢٠٠٧

صورة من مرافعه الحاج محمود عبد الجواد امام النيابه العسكريه

اضغط للتكبير
لابد ان نتعلموا من هذا الرجل ومن امثاله من الشرفاء
وفى انتظار تعليقاتكم

الحاج محمود احد اعضاء اتحاد النحالين العرب

عضو عامل وفى مصر يعتقل حسبى الله ونعم الوكيل

الخميس، ٢٩ مارس ٢٠٠٧

كلمه ا/ محمود عبد الجواد امام النيابه العسكرية




بسم الله الرحمن الرحيم
فى 17//3/2007
النيابه العسكريه -الحى العاشر-
نص المرافعه
بسم الله الرحمن الرحيم

سيدى الرئيس --الهيئه الموقرة
1- كرم الله تعالى الانسان وميزه ورفع قدرة فوق كل المخلوقات – بانه – سائر دون المخلوقات –له اراده -هذه الاراده تجعله لايقول ولايفعل الا ما يعتقد فى صحته وفى صوابه ليتسنى له ان يعيش وسط اولاده واهله و مجتمعه – مرتاح الضمير – مستريح النفس والا كفل الحق سبحانه له ان يقول لا ....لا لاى شئ من قول اوفعل لاترتضيه نفسه –ولايعتقد فى صوابه –لكى يلقى الله تعالى فى الاخرة وهو عنه راض ولم يدنس نفسه باى ظلم

.................. !!!
2- مفهوم الحرام عند كثير منا – يقف عند ترك الصلاه والصيام – وعدم الصدق والخيانه – الخ الخ ........ غير ان العلامه د/ القرضاوى قد فاجأ الامه – منذ اسبوع بتوسيع معنى الحرام –إذ قال تحويل المدنيين الى محاكمات عسكريه ... حرام !! – والتحفظ على اموال الناس بغير وجه حق – حرام !!! وتلفيق التهم للابرياء – والشرفاء- والوطنيون من اجل مصالح شخصيه حرام ... حرام ...حرام ....................
3- المؤسسه العسكريه درع الامة المانع من اى اعتداء خارجى – وهى شرف لنا جميعا ولها قانونها الخاص الذى يخضع له – العاملين فيها – والخاضعين تحت هذا القانون – اما ان يخضع امثالنا – ونحرم –بفرض اننا متهمون -- من قاضينا الطبيعى – نحن ليس بيننا وبينكم خصومه - لكن – كيف نقف امامكم – ويقف المتهم بالتخابر مع دوله اجنبيه ((عدوة لنا )) امام قاضى طبيعى .!!!؟
4- سيدى الرئيس الهيئه الموقرة – احد ابناء البرامكه – وكانوا ملوكا كابرا عن كابر – سال ابوه يوما - يا ابتى ابعد العز .... نسجن ونذل –((بعد الملك والملكوت والنياشين والاوسمه والرتب العاليه ..........)) – وكان الاب صالحا – لا يتميز عن حضراتكم – فقال نعم – يابنى فقال الابن متعجبا – كيف ؟ -..... فقال الاب – يا بنى ....دعوة مظلوم سرت بليل .. غفلنا عنها .. ولم يغفل الله عنها ...
سيدى ...اقسم لك – ان هناك دعوات كثيرة من امهات مظلومات وزوجات محرومات واولاد فى الجامعات – يشعرون بالضياع لغياب قدوتهم وعائلهم ...............
ارجوكم ......ارجوكم...... بالله عليكم ....لا تعرضوا انفسكم لهذه الدعوات

محمود عبد اللطيف عبد الجواد

الثلاثاء، ٢٧ مارس ٢٠٠٧

فرصه بمناسبه الربيع

فرصه للجميع
بمناسبه اعياد الربيع
معانا دستور للبيع
انتاج محلى مش تجميع
انتاج حكومه الظلم و التصنيع
اشترى قبل الفرصه دى ما تضيع
ايييه؟ هتشترى ولا تموت صريع؟
فى قطر محروق من نوع سريع
او فى عبارة ؟ ده شئ فظيع
او تتسجن فى سجن وضيع
وشركاتك يكون مصيرها التشميع
وتتحرم من اولادك كبير ورضيع
اصل ده دستور خليع
اول مافيه سياسه التجويع
وبعده كده حبس وسجن وتلويع
ولازم مع اسرائيل يكون فى تطبيع
واللى مش عاجبه التشريع
هيموت وهو فى سن الربيع
والفاسد هيكون فى منصب رفيع
والشاطر يكون فى سجن وضيع
انا بصراحه بلدى مش هبيع
لو جيبتولى الشاويش عبد السميع
دى مصر حرة رغم انف التبيع
ده الكاميرا الخفيه ؟ ها حتذيع ؟
لو عايز تذيع قول ذيع
لو مش عايز برضه هنذيع
اهو غلاسه كده وتشنيع

السبت، ١٧ مارس ٢٠٠٧

فاروتا بيقول اشعار

حكايه سلسبيل واستقبال وسرار
قصه ليها العجب وكلها اسرار
تعالى احكيها لك ياعم شهريار
كان يا مكان كان فى فى مصر شويه احرار
خيرت ومالك وجواد اصلهم من التجار
ومعاهم ناس محترمه وكمان اخوان شطار
وسمعتهم نضيفه ميه ميه ومعليهاش غبار
عايزين يعملوا نهضه ويخلوا مصر عمار
واشتغلوا وتعبوا وسهروا ليل ويا نهار
واخدا الموضوع جد ومن غير هزار
اصلهم عايزين ينجحوا وعندهم اصرار
وشغلوا الشباب و كمان عملوا استثمار
وبدل الدوله ما تشكرهم سجنتهم ورا الاسوار
واللى يشتغل فى مصر لازم يعوم ضد التيار
تيار الظلم والرشاوى والفساد والمرار
ولو قلت كلمه الحق تتاخد من غير انذار
وتتصادر فلوسك وتتسرق بدون اعذار
يا اما تكون عازف درامز او حتى جيتار
وتتاجر فى دم الشعب المصرى المحتار
وتملك مصنع حديد وتتحكم فى الاسعار
وتتدفع رشاوى لكل واحد من الكبار
او انك تكون واحد من شله الاشرار
اللى هى حاكمه البلد بالحديد والنار
هى دى الروشته بتاعت النجاح والازدهار
انك تسرق وتقتل وتتاجر فى الافكار
وانك تكون حرامى وغشاش ومكار
ولو مش عاجبك هتتاخد وتترمى ورا الاسوار
ولا يطلع عليك شمس ولا حتى نهار
عرفتوا ياناس ليه اقتصادنا فى انهيار

حوار مع زوجه الحاج محمود عبد الجواد




1.


بطاقة شخصية – نريد أن نتعرف عليك وعلى أفراد أسرتك؟
· الاسم: فوزيه شحاته مصطفى حنفى
· المؤهل: ثانويه عامه
· تاريخ الزواج: 12/9/1985
·
الأولاد:
*
مريم 1/1/1987
كليه التربيه جامعه اسكندريه الفرقه الثالثه
*
عبد اللطيف – 1/1/1988
كليه التجارة جامعه طنطا الفرقه الثانيه
* يونس 1/10/1989
المعهد العالى للتعاون الزراعى بالقاهرة
* محمد 1/10/1991
الصف الثانى الثانوى
*
فاطمه 19/1/1998
الثالث الابتدائى
.........................
2. ما هى ملامح الأستاذ محمود عبد الجواد الزوج والأب؟

الزوج الذى يعرف حق دينه في كل تعاملاته. مع الزوجه بالمعاشره بالمعروف و الموده والرحمه في وجوده داخل المنزل وخارجه وكأنه يري كل شئ في كل وقت وذلك بتفقد احوالنا ولوكان مسافرا يتابع احوالنا كل يوم ويسأل عن كل شئ كبيرا كان او صغيرا ويعطي توجيهاته ويرى النتيجه ويشاركنا الرأي في كل ما يحدث في المنزل
ملامح الاب : الاب الحنون العطوف الرحيم الذي يعامل اولاده بكل الحب والرفق ولكن الصارم وقت الخطأ كان دائما ما يجمعنا ويشاورنا في الامور الحياتيه سواء في العمل او خلافه أو ادخال فكره جديده في العمل وياخذ برأينا كثيرا ويحاول ان يدمجنا فى العمل حتى نعتمد على انفسنا
وكان فى كل صباح يوزع الادوار بينا فى العمل ويحاسب كل واحد منا على اتقانه العمل
................
3. كيف تعاملت مع موقف الاعتقال فى أول مرة؟
كان الوضع مفزعا جدا عندما قاموا بمداهمة البيت بعد منتصف الليل وكان الاولاد صغارا رضع وفزعوا من هول الطرق على الابواب والاصوات العاليه وضخامه الاعداد من العسكر والضباط الذين اتوا لاعتقتاله وانا فى حاله زهول شديد لان الاستاذ محمود زوجى محبوب جدا من الناس وانا اشعر بهذا جيدا ويتقى الله فى كل شئ ولايعمل اى شئ يخالف القانون او الشرع وغير انه يدعو الى الله عز وجل فهل هذه تهمه او جريمه تستحق كل هذه الاعتقالات فما الذى نحن فيه ؟؟ فى دوله اسلاميه حكامها مسلمون ام فى دوله اسرائيل؟؟ لماذا هذه الانتهاكات لحرمه البيوت ؟؟ غير اننى كنت صابرة واحتسب كل هذا الظلم لله عز وجل لان الله لا يضيع عمل المؤمنين
..............
4. ما هى ظروف اعتقال الأستاذ محمود عبد الجواد فى المرة الأخيرة؟
قام زوار الفجر بمداهمه المنزل الساعه الواحده والنصف ليلا وقام احد العسكر بالقفز من على السور الخارجى للبيت وفتح لهم الباب وكنا جمعيا نائمون وقاموا بالطرق على باب البيت الداخلى بشده حتى اننا فزعنا جميعا من شده الاصوات العاليه وانتشروا فى جميع انحاء البييت وكانهم يبحثون عن مجرم خطير وقاموا بتفتيش كل جزء وكل كبير وصغير فى المنزل حتى لم تسلم منهم حجرة النوم من التفتيش الدقيق وكنا نسال انفسنا لماذا كل هذا التفتيش؟ لماذا هذه المرة غير كل مرة ؟ حتى انهم غادروا البيت الساعه الرابعه صباحا ومعهم الاستاذ محمود وكل هذا الوقت وهم يفتشون فى المنزل وبعدها بايام قليله خرج قرار التحفظ على الاموال والشركات وبعدها قرار التحويل للمحاكمه العسكريه.......

5. ما هو أثر الاعتقال على الأولاد والأسرة؟ ماذا كان رد فعلكم؟
كان الاثر سيئ جدا اذ اننا اصيبنا بضرر كبير لاعتقال رب الاسرة بدون وجه حق ثم التحفظ على الاموال وغلق المحل وتشريد اكثر من 12 عامل يعملون معنا .. نحن نتسال هل هذا هو الاصلاح الذى تنشده الدوله ؟؟؟؟ هل هذه هى الديمقراطية والحرية؟؟ لكن الايمان بالله والتمسك بحبله المتين هى الملاذ الحقيقى لكل مسلم فى الازمات ورد فعلنا هو الصبر والاحتساب حتى نفوز بالاجر ان شاء الله...( ولنبلونكم بشئ من الخوف والجوع ونقص من الاموال والانفس والثمرات وبشر الصابرين ). واننا نثق تماما ان بعد العسر يسرا


....................
6. ما تعليقك على شعار "أذهب فلن يضيعنا الله" كيف ستديرون أحوالكم فى غياب عائل الأسرة؟
حقا انه سبحانه وتعالى قادر على ان يغير الحال الى حال فهو سبحانه يقول للشئ كن فيكون فهو ولينا وولى كل المجاهدين والكادحين الصابرين المحتسبين ولكن علينا دور كبير ومضاعف فى غياب عائل الاسرة اذ اننا لانقول شعارات وفقط انما الايمان ما وقر فى القلب وصدقه العمل فنحن موزعين الادوار بيننا انا واولادى بحيث لا يطغى شئ على الاخر عبادة الله اولا والمذاكرة ثانيا ومباشرة الامور الحياتيه من اكل عيش وخلافه..
..................00000...........
7. هل كان الاعتقال أمراً غريباً أو غير متوقع على المنزل؟
لا لم يكن امرا غريبا او غير متوقع لاننا تعودنا من هذا النظام انه عندما يعمل اى انتخابات او اى تعديلات يريد ان يؤمن نفسه وكاننا نحن الشر الذى يلحق به ولكن يجب عليه ان يعرف ان دوام الحال من المحال ويوم لك ويوم عليك
..............000000000000.................
8. فى رأيك ما هو الدور الاجتماعي والإعلامي للزوجة التي تم اعتقال زوجها فى نطاق الأسرة والأولاد والجيران؟
فى الاسرة ان تقوم بدور الام والاب فى نفس الوقت من حزم ومتابعه ومراقبه من غير افراط ولا تفريط وان تستعين بالله دايما على حمل هذه المسئوليه وان تحمد الله عز وجل و دائما تضع نفسها فى مقارنه بينها وبين من هم اشد منها فى البلاء كإخواننا في فلسطين ومن مات زوجها
وتصبر ولا تضعف امام اولادها ودائما تذكرهم بواجبهم نحو دينهم ووطنهم (( ومن يتق الله يجعل له مخرجا )).. ويجب علينا ان نكون الاسرة المثالية فى الصبر والايمان والشجاعه ولا نضعف لاننا اصحاب رسالة الحق وان نعرف الجيران والمجتمع ان دوله الظلم ساعه وان دوله الحق الى قيام الساعه (( ولا تهنوا ولا تحزنوا وانتم الاعلون ان كنتم مؤمنين))..
.........0000000................
9. كلمة من السيده . ... لزوجات المعتقلين؟
نحن ننتظر الفرج القريب من الله
..............
10. كلمة من السيدة .. ... لزبانية النظام؟
اتقوا الله فإن الظلم ظلمات يوم القيامه
.....................
11. كلمة من السيدة .. ... لشعب مصر؟
افيقوا فإن الدائرة ستدور عليكم


احمد فاروق (((فاروتا المصرى ))))...00