السبت، 16 يونيو، 2007

الصورة دى انا اللى مصورها بتليفونى لما كنت عالبحر عندنا فى البلد كنت مخنوق صراحه من كل حاجه
دى بقى المراكب اللى عالبحر بعد قرار وقف الصيد لمده شهر ونص ربنا يوقف بحال اللى اخدوا القرار ده

اولا بشكر المدون المحترم اوى مصراوى على التاج وجارى الرد عليه ان شاء الله
==========================================

امبارح بعد الضهر حسيت انى مخنوق وزهقان شويه بس شويه كتير خاااااالص

يعنى هما شويه مشاكل كده وان شاء الله يخلصوا

المهم سحبت الشنطه وحطيت فيها شويه هدوم والباسبور ومعرفش رايح فين

بس والدتى وجدتى منعونى وخلاص

المهم اخدت نفسى وعالبحر اقعد شويه مع نفسى

رحت لقيت الجو هادى يدوب كام واحد على كام صياد

لاقيت الراجل اللى بياجر كراسى وشماسى واقف

قلتله هات كرسى وشمسيه يا عم

الراجل راح جايب كرسى وشميه وتربيزة

جه يمشى قلتله حاسبنى الاول علشان ممكن امشى فى لحظه

قالى ماشى عندك الحسااب ........ يبقى سبعه جنيه ياباشمهندس

نعم ياحاج ليه سبعه قالى خلاص ياعم يبقوا سته بس

قلتله انا مش عايز الترابيزة انا كلها نص ساعه وماشى رحت مطلع تلاته جنيه وعاطيهموله



هاااا ينفعوا لا يا استاذ خلاص ياعم مش عايز حاجه انا ماشى

الراجل قالى خلاص هات التلاته جنيه

اصل العبد لله هو الوحيد اللى كان ماجر شمسيه وكرسى والظاهر الراجل عايز يستفتح

المهم قعدت شويه وسقعت من الهوا رحت قاعد فى الشمس وزعلت انى دفعت تلاته جنيه





=================================

الاسعار بقت نار

لا دى فعلا دمار

بجد من غير هزار



بحكم ان احنا شغالين فى الزيت والسكر والسمنه والشاى والصابون فى المحل

طبعا اكتر ناس بتحس بتغير الاسعار احنا

والناس غلابه بس هيعملوا ايه



واحد كل مايسالنى على حاجه اقوله زادت وبقت بكذا

الراجل زهق راح قايلى الشعب احسن حاجه يشوفلهم بلد تانيه يقعدوا فيه

طبعا قلتله والله احسن حل علشان الحكومه ترتاح

هناك 8 تعليقات:

مصراوي أوي يقول...

صورتك عثثثثثثثثل

كميل اوي ياد يا فاروتا

بالذات لما لحيتك طولت كدة يااااااد


يا عم مانتا شايف شباب بيموتو اهم وانت اللي كاتب في التدوينة اللي تحت دي


يعني تصلي ع النبي كدة وتتهد وتوحد الله وتفكر بهدوء وبلاش شغل الباسبور ده.........اساسا انت شكلك ارهابي وش هيسيبوك تروح اي مكان


خليك ف ادكو يا بني ولم الدور وعيب

بدل ماجي ازورك

فاروتا المصرى يقول...

السلام عليكم
مصراوى اوى حبيبى اوى
دايما انت اللى جابر بخاطرى
الله يديك اللى فى بالك

ارهابى ايه ياعم بس انت مش شايف قانون الارهاب

امام الجيل يقول...

ايه ده كله ايه ده كله اكشفناك خلاص وجارى بحث قوات الامن عليك الحق نفسك هههههههههههه
ربنا يكرمك ويباركلك الاخوة بقوا بلطجية كده ليه كل واحد حاطط صورته وتفاصيله شوية ويحط عنوانه كان نفسى اعمل كده بس نعمل ايه بقى اعذار
جزاك الله خيرا

فاروتا المصرى يقول...

ايه ياعم امام الجيل
نعمل ايه بقى
وربنا يستر
مينفعش مع البلطجيه غير كده

اسلام رفاعى يقول...

أ/ فاروتا
انا شخصيا مهما حصل مش حسافر مش حسيب مش هبطل

أبو حنيــن السكندرى يقول...

السلام عليكم

إيه عم فاروتا ممكن أعرف أنت من جماعة مين
على فكرة أنت بلدياتى بس إحنا عايشين فى إسكندرية

المهم دى أول زيارة لمدونتك

أسجل إعجابى بها

وبعدين أنت مالك بايع القضية كده
صحيح حاطط إسمك وصورتك وعنوانك
يابنى خليك عندك حكمة شوية بلاش تهور

صحيح هو الأخوة باين عليهم زهقوا خلاص وماعادش هاممهم حد

وبعدين غحنا ما أتعلمناش إن إحنا نهرب لكن أتعلمنا إننا نواجه

فمتزعلنيش منك وباسبور إيه ونيلة إيه

أصبر ياوله شويه كلها كام سنة والحال حيتغير
وكلها كام سنة وندخلوا الجنة

إيه هى الجنة تمنها رخيص ولا إيه

سلام
أبو حنين السكندرى
جيل الصحوة

دعوة الفردوس يقول...

كل اللي اقدر اقوله يابختكوا

عندكوا بحر يهديكوا

انا بقى في حته مفهاش بحر

بس برده

مش هسافر
مش هبطل
مش هسييييييييييييييييييب

arabcooL يقول...

This is such a nice addition thanks!!!
عرب كول
شات صوتي شات
شات مغربي
دردشه صوتيه
إنحراف كام
شات عرب كول
صوتي شات كول
دردشه صوتيه
سعودي كول
شات صوتي
شات صوتي
شات عربي
شات بنات كول
شات صوتي
دردشه صوتيه عربيه