السبت، ٢٨ أبريل ٢٠٠٧

على فكرة والله انا بهزر ده محصلش انا لسه ملقيتش حد اخطبه ادينى لسه بدور على اخت تستحملنى بس وربنا يكون فى عونها ادعولها
-------------------------
رحت اخطب الاخت نوارة
ابوها قاللى عندك بيت ولا عمارة
شغال فين فى بنك ولا فى السفارة؟
ابوك مين وزير ولا حتى وكيل وزارة؟
عندك عربيه يعنى بالعربى سيارة؟
قلت ياعمى انا احمد ومعايا بكالريوس تجارة
وابويا الحاج فاروق اكبر تاجر عطارة
وانا شغال معاه وبساعده فى التجارة
والشقه جاهزة يدوب عالمحارة
يعنى فاضل فيها السباكه على كام حتته نجارة
وهركبلها الكهربا واعملها احسن إنارة
وعاملها على كل شباك اجمل ستارة
قالى انت جاى تهزر روح بعيد اللعب فى الحارة
انا عايز ليها واحد اكون صايده بسنارة
يكون معاه فلووس ويكون شايلها فى الشكارة
----------------------------
هو ده فكر الاباء اومعظم الاباء الا من رحم ربى
بدل ما يجوز بنته لواحد يحافظ عليها ويكون بيتقى الله واول ما يساله يساله عن دينه واخلاقه
زى الرسول صلى الله عليه وسلم ماقال
--------------
لا بيساله عن شغله وابوة وفلوسه الخ الخ ....؟
وربنا يستر على الشباب بجد والله
انا على احر من الجمر فى ا نتظار تعليقاتكم المهمه فى الموضوع
فاروتا المصرى بتاع العطارة
على فكرة العبد لله مهندس كمبيوتر مع ايقاف التنفيذ
ومبرمج بلغه سى شارب و اس قيو ال داتا بييز بس حاليا شغال فعلا فى التجارة مع والدى
ليه؟ لانى حبيت التجارة احسن من البرمجه سبحان الله هو كده

هناك ١٢ تعليقًا:

عصفور المدينة يقول...

يا هندسة يابو زمل
التجارة أحسن فعلا انا باقولهالك من موقع الحدث
بخصوص القصيدة جميلة بس عايزين وزن ولا نوزن بره؟

فاروتا المصرى يقول...

اخى الحبيب عصفور المدينه
شكرا على كلماتك المتينه

الوزن مزبط يا باشا الحمد لله
ده احنا لسه جايبين ميزانه بالكهربا جديده والله حتىمنكام يوم
ونورت يا باشا

غير معرف يقول...

اخت اخوان مسلمين

مؤهل وناحية اجتماعية متكافئة

الجمال والجمال مسألة نسبية

معلش يا فاروتا بعمل اعلان جواز عندك
.....................
تكملة للهزار

اما انا فرحان فيك انهم موافقوش بيك
علشان تروح من غير عمك مصراوي
ماشي يا فاروتا مكنش العشم

غير معرف يقول...

شعرك جميل ومدونة رائعة
وتناول للموضوع بهذا الاسلوب حاجة جديدة
عبد الله .........

فاروتا المصرى يقول...

حبيبى مصراوى اوى
اعمل اعلان يا معلم ولا يهمك ده مدونتك برضه
وانا كمان بعمل اعلان انا عايز عروسه اخت اخوان مسلمييييين
ان شاء الله نروح المرة الجايه معاك يا عمى مصرواى

اخى عبد الله جزاكم الله خيرا على المرور والتعليق

Nothing To Lose يقول...

ايوة كدا
فهمنى
انا بردوا استغربت
وخلتنى حطيت ايموشنات مزبهله وبتاع
بس لا جامد
عجبنى اوى كلماته مش مكلكعه
لا لذيذة وجديدة

عندك حق جدا
للاسف كل الاباء دلواقتى كدا
الا من رحم ربى
ربنا يعف شباب وبنات المسلمين
ويهدى ابائنا جميعا

غير معرف يقول...

لا ماشاء الله عليك
فعلا تستحق لقب شاعر الاخوان
وهو ده فعلا حال الاباء
يعتقدون ان سعادة ابنائهم فى المال والمناظر
نعمل ايه بقى الدنيا ماشية بالمقلوب
وعقبالك بجد لما تروح تخبط الاخت نوارة

فاروتا المصرى يقول...

الاخت الغاليه ناثينج تو لوست
انا بتعليقك فرحت وهيصت
وعايز اغسل وشى بصبونه ميست


علشان تالوزن بس
بارك الله فيك
وكل عام وانتى طيبه
وشكرا على التعليق
متعرفيش بقى عروسه ليا؟؟؟
منتظر ردك


اخونا او اختنا المجهول /ه
شكرا على المرور والتعليق جزاكم الله خيرا
شاعر الاخوان لقب كبير عليا انا لا استحقه على الاقل فى هذه المرحله

بس طلاب غلس منى ممكن تبقى تسيب اسمك
سلاااام

BELBESY يقول...

وادى حال الدنيا يا صاحبى

بس مش تستسلم .. اوعى

لو خلاص قفلت فى وشك اخطفها
ايه رايك ؟ عاقل انا ؟

بس بجد ما شاء الله كلامك موزون صح اوى
لو حطيناه فى مصفا مش هينقط
يعنى ميخرش الميه فاهم ؟

وربنه يرزقك ببنت الحلال اللى امها دعيالها اكيد لانك اخترتها


اتمنالك السعاده مستقبلا

امضاء..
اخوك الصغيور..و

Nothing To Lose يقول...

ههههههههههههههههههههه
انا سعيده انك سعيد
وانت طيب ربنا يكرمك
عااااااااااااااااااااااا
قصدك انى بوحى بغسيل الوش
عااااااااااااااااااااا
قصدك ايه يعنى شكلك اريت بوست الشنطه وبتتريق عليا
ماشى ماشى

اعرف كتير بس انت شد حيلك كدا وانوى :P :P

مشروع انسان يقول...

كلامك جه على الجرح يا ولدى
فعلا مشكلة الجواز مشكلة كبيرة سواء فى المتاديات او فى الزوجة المنتظرة حتى اذا كانت اخت مش كفاية المهم طباعها اكيد اخلاقها ودينها كويسين بس يعنى والمهم كمان العيلة بجد كما قال رسول الله اياكم وخضراء الدمن قالوا وما خضراء الدمن قال المرأة الصالحة فى المنبت السوء ويا ترى هايستحملو الواحد وظروفه حتى اذا كانوا ملائكة بس يعنى ممكن يزهقوا يعنى مش عايز اعقدك ولا اكنى كلمتك اصلا هههههههه

شهاب الأزهر يقول...

معلش يا حاج فاروتا قبل ما أعلق على القصيدة هعلق على تغلق حبيبي إمام الجيل الأول ... أصل حديث خضراء الدمن لا يصح .. دا للتذكير فقط لأن موضوع نقل الأحاديث بيقلقني أوي ... معلش النزعة الأزهرية تغلب علي


نرجع لموضوع البوست بتاعك علشان لازمنا فيه قعدة عرب ومجلس صلح..

ازاي يا حاج فاروتا تبقى بتدور على عروسة وما تقولش ليا

لا لا لا .. أنا زعلان يا حاج فاروتا، يعني رايح تدور وتاعب نفسك ؟؟؟ طيب ما تقول يا راجل، وكمان تروح لواحد يقعد يتشرط عليك وبعدين يقول لك لأ.. طبعا تستاهل انه يقول لك لأ ما دام مش مديني خبر

آديك رحت وجيت وبرده من غير فايدة .. مش كان من الأول تديني خبر ..

عموما أنا كنت عاوزك تقول لي علشان أقول لك دور لي على عروسة معاك :):):) أمزح